شايف الحياة

شايف الحياة لخابيط

ورقة مليانة شخابيط

لحظات سكون وتنطيط

واقع طبعه : غتيت


الدنيا بيــــر غويط


بتخبى جواها السر


....
..

شايف الحياة متاهات


مابين زعاق وسكات


قهوة سادة وشربات


ضحكة وراها آهات


ماشيين ورا لذّات


وتروح سنين العمر

....
..

نفسى افهم نفسى


ينسانى خوفى ويأسى


واطلع بنتيجة بحثى


والقى فيكى نفسى


يا سفينة الدنيا ارسى


لو يوم على بر

الحياة ..1

الحياة مشوار
وطن واستقرار
او غربة مرار
و ف ساحة انتظار
واقفين طوابير

....

الحياة هتافات
لواحد ف ترشيحات
نواح فى ممات
زغروطة مع الشربات
و نهيق حمير

...

الحياة أحلام
نشوفها ف منام
نفرح قوام
وتطلع اى كلام
وواقع مرير

.....

الحياة هدوم ف دولاب
صفحة ف كتاب
حقيقة وسراب
شبورة وضباب
ف عيون كتير

......

الحياة مشاغل
تبين الراجل
ومين المجامل
ومين للحق قايل
ولو فى وزير

....

الحياة مناظر
جاهل عامل ناظر
غبى عامل شاطر
وفى البورصة خاطر
بورثه الصغير

....

الحياة مسئولية
عليك وعليا
أسوارها عالية
فرحتها غالية
فى راحة ضمير

الحياة ..2

الحياة حروب
تجوب الشعوب
غالب ومغلوب
قدر ومكتوب
الاتنين خسرانين

...

الحياة تاريخ
اللى راح مريخ
والقمر بصواريخ
والعرب بطيخ
فى لبه لايصين

...

الحياة طريق
يفوته الجرئ
يتوه البرئ
ومين يطيق
زحمة ملايين

...

الحياة انواع
شبعان وجاع
وشبع بعدما جاع
وناس فى صراع
بقالهم سنين
..
الحياة مراحل
فى جاى و راحل
وناس بتحاول
بس مين طايل
تقف بيه السنين

..
الحياة مواقف

للى شايف
في حد خايف
وحزام ناسف
ف وسط انتحاريين

..

الحياة ألغاز
فى بترول ولا غاز
تلاقى الف غاز
ببرميله فاز
ويسيبك مسكين

..

الحياة أسباب
فى صحة شباب
وخبرة شياب
ومسبب الاسباب
به نستعين

..

الحياة قصر
وآخره قبر
وكل عصر
فى خير وشر
و ينجو المؤمنين

..

الحياة جسر
فى كرم بحر
فى كره ونهر
ولو ألف مهر
ما يألّف قلبين

...

الحياة ناس
واحد هلاّس
ف النصب داس
وغيره محتاس
صفر اليدين

..

الحياة فرحة
والبركة طارحة
ف عروسة بطرحة
وناس جارحة
تحسد بعين

الحب

Fathi· Monday, 23 August 2010

الحب دنيا
فيها تتوه
واول ماتلقى
شمسها تغيب

...

الحب ناس
ماليها الاحساس
ونفسها خلاص
تلاقى النصيب

....

الحب فكرة
تايهة حايرة
كله فيها
زى الغريب

...

الحب انتظار
فرحةو مرار
تفوت اسوار
عشان الحبيب

....

الحب سؤال
جوابه اتشال
صعب المنال
وهو قريب

....

الحب قلوب
فيه تدوب
بعيدة الدروب
عن الحبيب

....

الحب انسان
مالوش عنوان
فى توهة ونسيان
واحساس عجيب

الحــــــب

سرعتنا صفر

سرعتنا واقفة عند الصفر
كتبنا كتير وخلص الحبر
وخرمنا آخر شوال للصبر
ل شيل همومنا لِعِبنا حديد
..
واقفين فى اشارة مرور
ألوانها باهتة ومفيش نور
واللى واقف اخر الطابور
شايف عسلية عمودها حديد
..
بصينا كده الناحية التانية
طريق مبيقفش حتى ثانية
قلنا حظوظ ودنيا فانية
يا حظ تعالى ليه بعيد؟
..
ان كان طريقهم سالِك
مفيش حد فينا يشارك؟
يفتح سكة واحنا نبارك
شعار مدرستنا طالِبنا بليد
...
عجل عربيتنا بيمشى ل ورا
موتور سليم ..بس ل ورا
من غير رغى ولا شوشرة
حد يجيبلنا عجل جديد

سرعتنا ... صفر
!!!!!!!!!!!!!!!!!
A7med Fat7y

مفارقة مش فارقة

دولات شباب رايقة
حشيش بانجو ومية


ودول شباب فايقة
على الناصية مستنية



دولات شباب سايقة
احدث موديل العربية


ودول شباب تايهة
مع ميكروباصات شقية

دولات شباب لاقية
أب فئة:حرامية



ودول شباب لاقية
أب موظف بمهية


دولات ف اماكن نائية
للوظيفة أهى مستنية


ودول مناصب راقية
بسكرتيرة م اللى هى


عموما الدنيا مش باقية
وفى يوم للحرامية


يتعلقوا كده ف ساقية
والنار عليهم حميّة

عام هجرى جديد

حاسب نفسك يلا  حاسب

هيجى يوم كلنا نتحاسب

فيــنا ناجح وفى راسب

على كل كتف ملك كاتب

كلامك افعالك مش سايب

وربك رحمته ملهاش حدود

...

افتكر يوم ظلمت فيه

وانسى يوم اتظلمت فيه

اللى ظلمته حاول ترضيه

واللى ظلمك ادعى ليه

يجى يوم ربك يهديه

اعمل حساب اليوم الموعود

...
دى بداية سنة جديدة

كل الصفحات لسه بيضا

قوم واكتب لنهاية بعيدة

بحبر الخير بداية سعيدة

لسه هتدخل مواقف عديدة

اوعى تخاف ربك موجود

...
عام هجرى أهو بيبدأ

خليك دايمأ صاحب مبدأ

فى سباق الخير تسبق

واوعى فى التفاهة تدقق

بلاش كذب خليك أصدق

لطاعة ربك جدد الوعود


كل عام وانتم بخير

اخوكم
احمد فتحى